Beth y gall y Tribiwnlys ei orchymyn a beth na all ei orchymyn mewn cyfraith.
Apeliadau AAA
Mae gan yr Awdurdod Lleol ddyletswydd i wneud yr hyn sydd wedi’i orchymyn ac mae’n cael cyfnod penodol o amser i gyflawni ein gorchymyn. Mae ein dogfen ganllaw Cyflawni’n gorchymyn (TAAAC 15) ar gael i’w lawrlwytho isod, neu os hoffech inni anfon copi atoch chi, cysylltwch â ni.
Asesiad
Os yw'r Awdurdod Lleol wedi gwrthod trefnu asesiad ar gyfer eich plentyn gallwn ei orchymyn i wneud hynny.
Gwrthod gwneud datganiad neu rhoi'r gorau i gynnal un
Os yw'r Awdurdod Lleol wedi gwrthod gwneud datganiad gall y Tribiwnlys ei orchymyn i wneud hynny. Ni all y Tribiwnlys, yn yr achos hwn, ddweud wrth yr Awdurdod Lleol beth y dylid ei gynnwys yn y datganiad.
Os yw'r Awdurdod Lleol yn penderfynu peidio â chynnal y datganiad gall y Tribiwnlys ei orchymyn i gynnal y datganiad.
Cynnwys y datganiad
Os yw'r Awdurdod Lleol wedi gwneud datganiad ar gyfer eich plentyn, wedi newid datganiad neu wedi gwrthod newid y datganiad yn dilyn asesiad, gall y Tribiwnlys orchymyn newidiadau i:
- rhan 2 (anghenion - pam bod eich plentyn angen help)
- rhan 3 (darpariaeth - yr help y dylid ei roi)
- rhan 4 (lleoliad - i ble y dylai'ch plentyn fynd i'r ysgol).
Hawliadau gwahaniaethu ar sail anabledd
Mae gan y Corff Cyfrifol ddyletswydd i wneud yr hyn sydd wedi’i orchymyn ac mae’n cael cyfnod penodol o amser i gyflawni ein gorchymyn. Bydd manylion y cyfnod amser i’w hwn i’w cael yn ein gorchymyn. Mae ein dogfen ganllaw Gweithredu ein gorchymyn (TAAAC 16) ar gael i’w lawrlwytho isod, neu os hoffech inni anfon copi atoch cysylltwch â ni.
Os yw'r Tribiwnlys yn penderfynu bod yna wahaniaethu ar sail anabledd, gallwn orchymyn unrhyw gamau gweithredu yr ystyriwn yn rhesymol i wneud yn iawn am effaith y gwahaniaethu hwnnw. Ni all y Tribiwnlys orchymyn iawndal ariannol.
Gallai enghreifftiau gynnwys:
- hyfforddi staff ysgol
- llunio canllawiau newydd i staff
- rhoi hyfforddiant ychwanegol i wneud yn iawn am golli dysgu
- rhoi ymddiheuriad ysgrifenedig
- trefnu tripiau neu gyfleoedd eraill i wneud yn iawn am weithgareddau y gallai eich plentyn fod wedi'u colli.